Jostunak, 2011 joan zaigu eta balantze modura gogoratuko ditugu egindakoak eta egin gabe geratu zaizkigunak:

1.- Gero eta eragile gehiago:

Sarea josten ekimenaren bigarren urtea martxan jarri genuen otsailaren 1ean, eta beste 7 eragile gehitu ziren euskararen aldeko auzolanera: Getxoko Ikasle Abertzaleak, J.B. Zabala ikastetxeko guraso-elkartea, Getxoko Udaleko euskara-zerbitzua, Bereterretx euskal kultur elkartea, Itzubaltzeta gaztetxea, Begihandi kultur elkartea eta Geroa ikastolako guraso-elkartea. 37 eragileon artean erabaki genuen lau jarduera egitea urtean zehar: Berbakafea, manifestua, “gure berbakere” txapelketa eta agenda bateratua.

2.- Egindakoak:

- Berbakafea: Word coffe metodologia erabilita, eragileetako ordezkariak 3 orduko saio batean batu ginen bi puntu hauen inguruan hausnartzeko, eztabaidatzeko eta hitz egiteko: Sarea josten ekimena eta euskararen egoera Getxon. Hementxe duzue txostena.

- Testu bateratua: Berbakafean jasotako iritziak eta ekarpenak batuta, Sarea josten manifestua idatzi genuen. Manifestu hori euskararen aldeko testu bateratua izan zen, adierazi zuena zer garen, zertan gabiltzan eta zer nahi dugun aurrera begira. Testua herrian plazaratu genuen udaberrian: kaleetan, herriko eragileei, alderdi politikoei, etab. Hementxe duzue manifestua.

3.- Egin gabe geratu zaizkigunak:

- Agenda bateratua: helburua da Getxoko euskaldunok jakitea Getxon, hilero, euskaraz zer jarduera dagoen (hitzaldiak, kontzertuak, tailerrak, irteerak, etab.). Agenda Interneten sortuko da, kudeaketa ez zentralizatzua izango du, eta kartelak eta orriak inprimatu ahal izango dira.

- “Gure Berbakere” txapelketea: inguruetako herri batzuetan (Mungia, Sopela, Plentzia) esaera zaharren txapelketa arrakastatsuak antolatzen dituzte. Egingo dugu geuk ere horrelako bat? Egun osoko egitaraua: poteo-txapelketa, herri-bazkaria, finala, kontzertua.

2012ra begira, eta Sarea jostenen hirugarren urteari hasiera emateko, proposatzen dizuegu denok elkartzea aurkezpen-luntxa egiteko, otsailaren 7an, asteartea, arratsaldeko 20:00etan, Algortako Aldai Patronatuan. Aurreko aurkezpenetan bezala, honetan ere azalduko dugu zer den Sarea josten ekimena, zer egin dugun orain arte eta garrantzitsuena: 2012an zer egin nahi dugun.

Orain dela aste batzuk Argia aldizkariko Zihara Enbeita kazetariak elkarrizketa egin zigun erreportaje bat idazteko Sarea josteni buruz. Oraintxe argitaratu dute. Hementxe duzue erreportajea: http://www.argia.com/argia-astekaria/2282/sarea-josten-ekimena

Getxoko hainbat eragilek euskararen aldeko Sarea josten ekimen irekia, herritarra eta horizontala jarri genuen martxan 2010eko otsailean, euskararen alde gabiltzanok, euskaraz lan egiten dugunok eta euskaldunok elkar ezagutzeko eta elkarrekin lan egiteko.

2010ean 30 eragilek eman genion hasiera ekimenari eta hainbat jarduera antolatu genuen: erakusketa ibiltaria, kuñak Koska irratian, ekintzen egutegia, herri-bazkaria, etab.

2011n jostunen familia handitu egin da eta beste 7 eragile gehitu dira euskararen aldeko auzolanera: Getxoko Ikasle Abertzaleak, J.B. Zabala ikastetxeko guraso-elkartea, Getxoko Udaleko euskara-zerbitzua, Bereterretx euskal kultur elkartea, Itzubaltzeta gaztetxea, Begihandi kultur elkartea eta Geroa ikastolako guraso-elkartea. 37 eragileon artean berbakafea egin genuen otsailean eta manifestua kaleratu berri dugu maiatzean. Udazkenari begira beste bi helburu adostu genituen: Gure berbakere txapelketa eta Agenda bateratua.

Getxoko 36 eragilek idatzi eta adostu dugun testua duzue hemen, gure diagnostiko eta eskaerekin.

Manifestua

Herri honetan, azken urteotan, hainbat pertsonak eta eragilek egindako lanari esker euskalgintzan eta herrigintzan dabiltzanak, irakaskuntzakoak, elkarteak, eta baita Getxoko Udala ere–, euskarak aspaldiko egoerarik onena bizi du, zalantzarik gabe: gero eta euskaldun eta euskaltzale gehiago gaude, eta gero eta jarduera gehiago egiten dira euskaraz esparru gehienetan. Baina herri euskalduna lortu nahi badugu, euskaratik eta euskaraz, lan handia egin beharko dugu, oraindik ere, denon artean.

Alde batetik, herriko euskaldunok eta euskaltzaleok euskararen sarea indartu eta zabaldu behar dugu, gure arteko harremanak sendotu eta trinkotu behar ditugu. Horregatik aukeratu genuen sarearen irudia:

Sareak bi elementu ditu josita: puntuak eta hariak. Puntuak euskaldunak gara eta hariak dira gure arteko harremanak. Eta biak dira garrantzitsuak eta ezinbestekoak sarea osatzeko. Punturik edo haririk ez badago, sareak zuloak izango ditu eta ez da sare izango.

Sarea josten ekimenean batu garen guztiok lanean gabiltza euskararen sarearen punturen batean: euskaltegia, berbalagun-taldea, institutua, guraso-elkartea, taberna, familia, koadrila, euskarazko komunikabidea… Horiek denak puntuak dira, horietan euskaldunak daudelako. Euskararen sarean puntu asko dauzkagu, guk uste baino gehiago. Baina puntuak ez dira bakarrik taldeak edo elkarteak edo erakundeak, gutako bakoitza puntu bat da euskararen sare honetan. Euskaldun bakoitza, euskara ikasten dabilen bakoitza, euskara ulertzen duen bakoitza, puntu bat da. Eta ez gara puntu gutxi, uste baino gehiago gara. Hala ere, puntu asko falta dira oraindik eta falta direlako, zuloak daude sarean; joango gara sarea ehuntzen: lagunak eta ezagunak animatuko ditugu euskara ikasteko eta umeek euskara ezagutzeko duten eskubidearen alde egingo dugu.

Eta sarea egiteko, puntuak bezain garrantzitsuak dira hariak, eta uste dugu euskararen sare honetan puntu gehiago dauzkagula hariak baino. Eta noiz lotzen dira puntuak harien bidez? institutuko ikasleek tabernariarekin euskaraz egiten dutenean, euskaltegiko euskara-ikasleak udaleko langile euskaldunarekin euskaraz egiten duenean, koadrilako lagunek ere UK eta ukberri irakurtzen dutenean… Hariak lotzen ditu sarearen puntuak, familia barruan, koadrilan, gurasoen artean, lankideen artean. Horregatik konpromisoa hartuko dugu, eta ahal dugun guztietan, euskaraz hitz egingo dugu.

Herritarrok, orain dela urte batzuk, bai euskarari esan genuen eta, orain, horrekin batera, euskaraz bai ere esaten dugu; hau da, euskararen alde egongo gara eta euskararen alde egingo dugu: euskaraz biziko gara.

Bestetik, ordezkari politikoei eskatzen diegu hizkuntza-politika ausartagoa eta eraginkorragoa aurrera eramateko. Azaldu nahi diegu egindakoa birplanteatu behar dutela eta euskararen aldeko ekintza puntualez gain, euskaraz bizitzeko aukera eman behar dutela esparru guztietan. Gainera, esan nahi diegu ez gaudela prest euskararen bidean atzera egiteko eta orain arte denon lanari esker lortutakoa galtzeko. Martxan dauden proiektuak, baliabideak eta diskurtsoak urtetik urtera gehitu, handitu eta sakondu behar dira etengabe, euskara denona eta denontzat delako, alderdi politikoen siglen gainetik eta egoera politikoen gainetik.

Kolpe, kolpe, kolpeka, josi eta josi…

Agurra kultur elkartea, Aixerrota Boleibol KT, Aixerrota institutua, Algortako bertsolari eskola “ALBE”, Algortako emakume gazteon asanblada, Algortako San Inazioetako jai-batzordea, Algortako Ungari mendi-taldea, Andra Mari ikastetxea eta guraso elkartea, Begihandi elkartea, Berbalagunak, Bereterretx euskal kultur elkartea, Bizarra Lepoan euskara elkartea, Egizu Getxo Euskaldun elkartea, Eztabaida gune antiautoritarioa, Geroa Mendi Taldea, Getxo herri-kirol taldea, Getxo Kayaka, Getxo rugby taldea, Getxoko Bilgune Feminista, Getxoko Udalaren euskara-zerbitzua, Getxoko Udal Euskaltegia, Gorrondatxe Kultur Elkartea, Ikasle Abertzaleak, Itxartu, Itxas-argia elkartea, Itzubaltzeta gaztetxea, Jose Antonio Agirre Euskaltegia, Juan B. Zabala ikastetxeko guraso-elkartea, Koska irratia 108 FM, Lauaxeta AEK euskaltegia, Romo Ikastetxea, San Nikolas ikastola, Txorimalo gaztetxea, UK aldizkaria, Ukberri.net agerkari digitala, Uktest txalaparta elkartea.

Otsailaren 25ean Algortako Villamonte kultur etxean 36 lagun elkartu ginen, hainbat elkarte eta kolektibotakoak, eta hemen dituzue gure hausnarketak:

Berbakafean jasotakoak

Eskerrik asko parte hartu zenuten guztioi! Ukberri.net-eko lagunei ere eskerrak argazkiengatik.

Otsailaren 1ean jarri genuen berriro ere martxan Sarea josten ekimena.

Honako eragile hauek egon ginen bertan:

AEK, Algortako Bilgune Feminista, Algortako Emakume Gazteon Asanblada, Aixerrota institutua, Bizarra Lepoan, Egizu Getxo Euskaldun!, Getxoko Udaleko Euskara Zerbitzua, Ikasle Abertzaleak, Itxartu kultur taldea, Itzubaltzeta gaztetxea, Jose Antonio Agirre euskaltegia, Koska irratia, UK aldizkaria eta UKBERRI.NET.

Algortako Aldai patronatuan egin genuen aurkezpen-luntx horretan honako gai hauek azaldu genituen:

1.- Sarea josten ekimena nola eta zergatik sortu genuen, eta 2010ean zer egin genuen. (Ikusi beheko aurkezpena)
2.- Eragile batzuek lau puntu dituen proposamen bat egin dute 2011rako.
3.- Edonork edozein proposamen, iritzi, kritika, kezka, zalantza edo asmo aurkez dezake, baita lau puntu horien ingurukoa ere, otsailaren 25era arte.
4.- Berbakafea otsailaren 25ean, ostirala, egingo dugu, arratsaldeko 17:30ean. Lekua ez zen finkatu. Bertan bi punturen gaineko hausnarketa egingo dugu: Sarea Josten ekimena bera eta euskararen egoera Getxon. Guztiok zaudete gonbidatuta etortzera. Antolamendua errazteko, data hori baino lehen esan beharko da talde bakoitzeko zenbat jende joango den.
5.- Agenda bateratua sortzeko, lan-talde bat osatuko da. Beraz, parte hartu nahi duenak aukera izango du.
6.- “Gure berbakere” txapelketea udazkenean egingo da, baina oraindik ez dauka data finkorik. Horretarako ere, lan-taldetxo bat prestatuko da eta nahi duenak aukera izango du parte hartzeko.

Sarea josten 2011-02-01 aurkezpena

Euskararen aldeko auzolana Getxon

Eragile batzuen artean prestatzen gabiltza Sarea josten ekimenaren 2011ko aktibitatea. Hori aurkeztu, azaldu eta denon artean kontrastatzeko, iaz bezala, luntx-bilera egingo dugu otsailaren 1ean, asteartean, 19:00etan, Aldai Patronatuan. Aurkezpen horretan, denon artean aztertuko dugu zer egin nahi/ahal dugun aurten SJen barruan, nola eta noiz. Proposamenaren 4 puntuak hemen behean dituzue, labur-labur azalduta. Telefonoz deituko dizuegu konfirmatzeko nortzuk egongo garen.

1.- Berbakafea
Word coffe metodologia erabilita, eragileetako ordezkariak 3 orduko saio batean batuko gara bi puntu hauen inguruan hausnartzeko, eztabaidatzeko eta hitz egiteko: Sarea josten ekimena eta euskararen egoera Getxon.

2.- Testu bateratua
Berbakafean jasotako iritziak eta ekarpenak batuta, Sarea josten manifestua idatziko dugu. Manifestu hori euskararen aldeko testu bateratua izango da, adieraziko duena zer garen, zertan gabiltzan eta zer nahi dugun aurrera begira. Testua herrian plazaratuko da udaberrian: kaleetan, herriko eragileei, alderdi politikoei, etab.

3.- Agenda bateratua
Helburua da Getxoko euskaldunok jakitea Getxon, hilero, euskaraz zer dagoen. Jarduerak euskaraz antolatzen ditugunok lanean hasiko gara 2011ko otsailean agenda diseinatzen eta 2011-2012 ikasturtearekin batera (urriaren 1ean) Sarea josten agenda aurkeztuko dugu. Agenda Interneten sortuko da, kudeaketa ez zentralizatzua izango du, eta kartelak eta orriak inprimatu ahal izango dira.

4.- “Gure Berbakere” txapelketea
Inguruetako herri batzuetan (Mungia, Sopela, Plentzia) esaera zaharren txapelketa arrakastatsuak antolatzen dituzte. Egingo dugu geuk ere horrelako bat? Egun osoko egitaraua: poteo-txapelketa, herri-bazkaria, finala, kontzertua.

Mila esker denagatik eta edozein ekarpen, zalantza edo galdera baduzue, bota lasai asko

Bizarra Lepoan, Egizu eta UK-ko jostunok

"Maite nuen" eleberria itzuli zuen Xabi Payak

“Maite nuen” eleberria proposatu genuen apirilean zehar irakurtzeko. Lehen aldiz itzultzaile bat gonbidatzen genuen, baina ez edozein itzultzaile, etxekoa dugun Xabi Paya, baizik. Eta, nola ez, ez gintuen inondik inora dezepzionatu. Hitzaldi teoriko-praktikoa antolatu zuen, interesgarria, ondo azalduta, grafikoa… Xabi gustatzen zaigu, bai horixe!

Getxotzaindiako ohorezko kideek ez zuten hutsik egin

sarea josten: dantza-emanaldia from Egizu Getxo Euskaldun on Vimeo.

Igande goizean kalejira eta dantza-emanaldia prestatu zituzten herriko hiru elkartek: Agurrak, Itxartuk eta Itxas-argiak. Benetan ikusgarria antolatu zuten jaia, eta, inportanteena, inplikatu zuten jendea. Biba zuek!

Algortatik Getxora kalejiran

Portuzaharreko etxe artean erakusketa

Egunek aurrera egin ahala erakusketarekin ere aurrera goaz sarea josten. Portuzaharrean eguzkia izan genuen lagun goiz partean. Arratsaldean bat-bateko ekaitzak harrapatu gintuen. Astelehen goizean Aixerrota institutura aldatu genuen erakusketa, eta bertan ikusgai izango da ostiral eguerdira arte.

Jende asko ibiltzen da bertan eguerdietan